“Ondas de ilusións” parte de novo polos mares educativos!
Despois do éxito da campaña no curso pasado , o Grupo de Acción Local do Sector Pesqueiro (GALP) Golfo Ártabro embárcase nunha nova edición do proxecto educativo “ONDAS DE ILUSIÓNS: ESCOLAS DO MAR 2017-2018”. Nesta ocasión, da man dunha das grandes protagonistas da nosa ría, a Ameixa Tareixa.

 

Que é “Ondas de ilusións: escolas do mar”?

Ondas de ilusións: escolas do mar é un proxecto educativo de posta en valor dos recursos mariños e coñecemento da contorna. Os seus obxectivos principais son:

  • Dar a coñecer na comunidade educativa os valores do litoral do Golfo Ártabro Norte: cultura mariñeira, recursos naturais, artes e tradicións pesqueiras.

  • Motivar un cambio na relación co medio mariño para que esta estea baseada no respecto e na promoción da sustentabilidade ambiental e socioeconómica.

  • Pór en valor a contorna e as actividades económicas relacionadas co mar.

 

A quen vai dirixido?

Este programa está deseñado especialmente para os nenos e nenas dos centros do Golfo Ártabro, con idades comprendidas entre os 8 e os 12 anos. En total 500 participantes dos seguintes municipios: Ferrol, Narón, Neda, Fene, Mugardos, Ares, Cabanas, Pontedeume, Miño e Paderne.

 

Quen o imparte?

O programa é deseñado e executado por especialistas en bioloxía mariña e educación ambiental, con percorrido na comarca no traballo con infancia e na posta en valor dos recursos naturais e locais.

 

Como o facemos?

Os fitos deste programa están pensados para garantir unha achegamento significativo e lúdico aos eixos propostos, que esperte a curiosidade no alumnado pola súa contorna e o medio litoral, e complemente o traballo desenvolto polos equipos docentes. Empregamos metodoloxías que promoven a implicación activa dos nenos e nenas na exploración e defensa da súa contorna.

 

Así o facemos:

  • sesión didáctica por aula
  • unidade didáctica
  • concurso de contos
  • saída
  • vídeo final

+ info aquí

 

Por que coa Ameixa Tareixa?

A Ameixa Tareixa é a mascota que define a identidade desta edición de Ondas de Ilusións. A través dela, poderemos…

  • Poñer en valor dos traballos artesanais e das traballadoras/es do mar: a propia Ameixa Tareixa será quen relate como é a súa relación coas persoas traballadoras.
  • Dar a coñecer a fauna e flora do litoral: a Ameixa Tareixa contaranos como son os seus amigos e amigas (a robaliza, a xarda, a zamburiña, etc.) así como a descrición de como é o lugar onde vive.
  • Promover a sustentabilidade ambiental e social: a importancia de tratar ben o mar para que ela e os seus amigos e amigas sobrevivan, así como do crucial de manter a actividade pesqueira e marisqueira tradicional.

 

Como pode participar o meu centro?

A participación en Ondas de Ilusións é de balde e con prazas limitadas. Cada centro poderá solicitar formar parte del a través de:

698 15 74 14
ondasdeilusions@gmail.com


Este Programa está financiado con fondos do Programa FEMP 2014-2020, dentro das actividades de animación e divulgación do GALP Golfo Ártabro Norte para este ano 2018.